Habari za sasa hivi

TFS KUTOA MITI LAKI TANO YA MATUNDA NA MAJI KWA MKOA WA TABORA

Na Tiganya Vincent, RS- Tabora
31 Mei, 2017
Mkuu wa Mkoa wa Tabora Bw. Aggrey Mwanri anatarajia kupokea miche laki tano ya matunda na miti maji kutoka kwa Wakala wa huduma za Mistu Tanzania (TFS) kwa ajili ya kupanda katika Taasisi mbalimbali mkoani  humo.
Hatua hiyo ni sehemu ya kuunga mkono juhudi za viongozi wa Mkoa wa Tabora na wadau mbalimbali wa kampeni za upandaji miti zinaendelea katika maeneo mbalimbali.
Kauli hiyo ilitolewa jana na Bw. Mwanri kwenye mkutano  na Maafisa Elimu Kata Manispaa  ya Tabora alipokuwa akiwaagiza kuhakikisha wanawahimiza walimu wa shule zote kuendelea kusimamia zoezi la umwagiliaji wa miti iliyopandwa katika shule mbalimbali hata wakati wa likizo.
Mkuu huyo wa Mkoa wa Tabora alisema kuwa aliongea na Mtendaji Mkuu wa Wakala wa Huduma ya Mistu Tanzania Profesa Dos Santos Silayo na kukubali kutoa kiasi hicho cha miti ili kuongeze nguvu katika juhudi za wadau mbalimbali mkoani humo.
Alisema kuwa ni vema walimu wakatumia kipindi hiki wakati wakigonja miche hiyo kuwasili kuendelea na maandalizi ya kutenga maeneo  ya upandaji wa miti hiyo kwa kuanda mashimo, chupa, fito, kamba na mbolea.
Bw. Mwanri alisema kuwa miti ya matunda mingi itapandwa katika Taasisi kama vile Hospitali , Vyuo na Shule kwa ajili ya kutunza mazingira na matunda kwa ajili ya jamii iliyopo katika eneo husika.
Kwa upande wa miti iliyokwishwa pandwa Mkuu huyo Mkoa amewaagiza Maafisa Elimu hao wa Kata kuhakikisha wanawahimiza Walimu kuwasimamia wanafunzi ili waweze kumwagiliaji miti hiyo maji walau mara mbili kwa wiki wakati wa kipindi chote cha likizo.
Aidha , Mkuu huyo wa Mkoa alimwagiza Kamanda wa Kikosi cha Usalama Barabara Mkoa wa tabora kusaidia kusimamia usalama wa wanafunzi kuvuka barabara wakati siku ambazo zitatengwa na Manispaa ya Tabora kuwa ndio za umwagiliaji.
Naye Kaimu Afisa Elimu wa Manispaa ya Tabora Gaudencia Kafu alisema kuwa zoezi la umwagiliaji litakuwa likifanyika mara mbili kwa wiki kwa siku ya Jumatatu na Alhimisi ili kuhakikisha miti hiyo inaendelea kukua.

Alisema kuwa anatarajia kutoa maelekezo hayo kwa Shule zote za Manispaa kabla ya wnafunzi hao hawajafunga siku ya Ijumaa.